سينديريب جام شرابي ميله بيگانه يم ايندي

منه مجنون دئمگ اولماز، دلي ديوانه يم ايندي

باشقا بير عالميده عشق و محبت گزيره م من

مي نابي باشا چئكميش مست مستانه يم ايندي

شهرتيم عرشه چاتيبدي ره عشقي طي ائده ر كن

ديللرين از بري اولموش داها افسانه يم ايندي

دئمه يين جهلين ايچينده دلي بير كيمسه ايميش او

همي علامه ي دهرم ، همي فرزانه يم ايندي

عرفا سجده قيليللر منه ساري عشقه خاطير

عيسه يه اصل كليسا ، بتا بتخانه يم ايندي

هوري يه جنت اعلا ، ملكه عرش مصلي

تشنه يه چشمه ي زم زم ، ميه ميخانه يم ايندي

منيله عشقيله سررين تاپماقا جهد ائتمه ساقي

شمعلري آتشه سالميش تكجه پروانه يم ايندي

گر زليخاي زمان سئوسه سني ، غم يئمه رم هئچ

او ازلدن مني سئودي بئله جانانه يم ايندي

هر قالان عهديمه محكم اولمادي ذره پشيمان

دوزدو كي يورقونام آمما هله مردانه يم ايندي